“下只角”个脾气
作者：李大伟
来源：新民晚报.4.30
上海话改写：郭莉
朗读：安娜
推荐：丁迪蒙
（朗读者近照）
从前，上海以苏州河作为界河，南边叫“上只角”，北边叫“下只角”。上下之间，生活趣味是老勿一样个：南边地界无论是小老板、小职员还是小混混，一致看勿北边个各只阶层。眼皮翻翻，眼角瞥瞥，口头语就是：“下只角”！
欸歇辰光，天热了：“上只角”勒屋里也要着件衬衫个，“下只角”呢，勒外头也只是一件汗马夹。过年了：“上只角”要烫头发个，“下只角”呢，就是剪剪头发。
吃饭辰光吃汤：“上只角”拿调羹舀一勺吃，“下只角”呢，捧起大海碗一口吃光。
……
由于历史原因，上海有个特点：名医院侪勒“上只角”，名大学呢，倒是侪勒“下只角”。医院要集中勒经济状况比较好个区域；国立大学则要建勒荒地浪——无需动迁，零成本划拨。
改革开放之后，上海个城市面貌发生了邪气大个变化，已经呒没“上只角”“下只角”个区别了。但是勒勒大家个心理浪向，还有勿少难以磨灭个印迹。
我蛮念旧个。有常时，难免要打电話寻做教师个同学，尤其是勒勒“上只角”个同学。接听者往往交关警惕个问我：“有啥事体伐？”听口气是生怕有事体寻伊。不过迭能也有优点个，伊也勿会来麻烦侬，“水牛角，*牛角，各归各”冷冰冰个，做个理性个“经济”人。
现在向南过了苏州河，充其量去搿面个机关、报社寻寻朋友，邪气少到伊面个新里洋房去寻熟人了；就算是去了，也蛮小心个，礼貌多了、礼物多了、笑容多了，真情呢，倒是拨轧得偏生是寻勿大到了。
最近，五零后、六零后搿批人，从四面八方集中到蓝天酒家，包了一只层面，开了十几桌，侪是老邻居，有得一百多个人唻。吹叫鞭个叫晓忠，伊叫我也来，因为我是住勒隔壁鞍山六村个，相当于以“联合国观察员”个身份参与。因为减肥，我夜里一般勿进食，所以坐勒海勿动筷子，再讲，搭大多数人也勿熟悉，有眼落寞。同桌个朋友看見了，倒过筷子来搭我搛菜，送到我个盘子里，还举牢子筷子讲：“筷子我倒过来了，迭个一节是清爽个哦。”看侬张口吃了，伊再坐定下来：“嗯，迭个像阿拉大杨浦个脾气！”
改革开放四十年，尤其年，上海实行商品房销售，一眼老邻居侪一个一个，一家一家迁出了旧居，各奔东西，一别已經有得几十年了，搿趟又见面，侪兴奋得哇啦哇啦叫，勿叫名字个，只有绰号，酒吃了还勿算，拿吃过个酒杯放勒转盘浪，转到对面，揿牢转台，正好停勒勒对方个嘴巴前头，挑衅伊：“我吃过个杯子，侬敢接牢吃伐？”对方呢，拿起杯子：“哪能啦，啥人吓啥人啊！”一口頭吃光，赛过歃血结盟，表示勿忌、勿嫌比，真心是好兄弟。双方乃末要紧立起来，跑过去，一只大拥抱，高聲叫：“肺贴肺！”搿句言话是大杨浦私人定制个短语。表示伊拉是肝胆相照个。
搿天夜里个酒水，始终是闹哄哄个，大家侪端仔酒杯、拎仔酒瓶串场子，寻找失落个回忆。“侬现在勿谈了！”“上去了！”
两个阶层个人，可以聚勒一道称兄道弟，但是“闰土”只好勒勒“下只角”，勒老邻居、老朋友面前，可以勿拘束、勿识相。要是勒“上只角”，葛就要识相、要拎得清，搿个，就是“懂规矩”！当然，迭个也就是“上只角”搭仔“下只角”个区別了。
注：本文改编自“夜光杯”，原文可点击下方“阅读原文”。
吳越小豬投稿郵箱：
emil_zzm
.